काठमाडौंं । नेकपा माओवादी केन्द्रका उपाध्यक्ष कृष्णबहादुर महराले शनिबार पदाधिकारी बैठकपछि पत्रकारहरुसँगको कुराकानीमा सरकार निर्माणका लागि सबै विकल्प खुला भएको सुनाए ।
सबै विकल्प खुल्ला भन्नुको अर्थ नेकपा एमालेसँग पनि मिल्न सकिने हो भन्ने संवाददाताहरुको प्रश्नमा उनले त्यसमा ठोस जवाफ दिएनन्, तर अस्वीकार पनि गरेनन् ।
महराको उक्त अभिव्यक्तिको अध्यक्ष पुष्पकमल दाहाल प्रचण्डको सचिवालयले शनिबार नै खण्डन ग¥यो । ‘हाम्रो पार्टीको आज बसेको पदाधिकारी बैठकले निर्वाचनको समीक्षा प्रारम्भ गर्नुका साथै गठबन्धनको पक्षमा दृढतापूर्वक उभिएर अगाडि बढ्ने निर्णय गरेको छ,’ स्वकीय सचिव रमेश मल्लले यसबारे प्रष्ट्याएका थिए ।
माओवादी केन्द्रका एक पदाधिकारीका अनुसार महराले भनेजस्तै सरकार निर्माणका लागि सबै विकल्प खुला राख्ने विषयमा पनि शनिबारको बैठकमा छलफल भएको थियो । ‘महराजीले भने जसरी बैठकमा कुरा उठेको पनि हो’, ती पदाधिकारीले भने, ‘कुरा उठ्नु र निर्णय हुनु फरक कुरा हो । उहाँले नबोल्ने भनेको कुरा बोल्नुभयो ।’
पदाधिकारी बैठक आइतबार पनि बस्यो, तर महरा उपस्थित भएनन् । आइतबारको बैठकमा निर्णय नभएको कुरा बोलेको भन्दै धेरै पदाधिकारीले महराको आलोचना गरे । बैठकपछि पत्रकारहरुसँग प्रतिक्रिया दिएका महासचिव देव गुरुङले महराको भनाइ सच्याए । ‘अहिले गठबन्धनको विकल्पका बारेमा छलफल भएको छैन, गठबन्धन यथावत भएकाले त्यहीँबाट (सरकार निर्माणको) प्रयास हुने कुरा स्वाभाविक भइहाल्यो’ उनले भने ।
महराले शनिबार दिएको अभिव्यक्तिबारे पनि पत्रकारहरुले गुरुङसँग जिज्ञासा राखेका थिए । ‘हिजो कुन प्रसँग, सन्दर्भमा कुरा प्रकट भए’, गुरुङले भने, ‘तर, सरकार गठनका लागि गठबन्धनको विकल्पका बारेमा केही कुरा भएकै छैन ।’ महरा बैठकमा नभएकाले प्रचण्डले यसबारे भने खासै चर्चा नगरेको अर्का पदाधिकारीले बताए ।
