जनकपुरधाम । प्रदेश २ को सचिवालयका कर्मचारीमा कोरोना संक्रमण पुष्टि खबर प्राप्त लगत्तै आज बस्ने भनिएको प्रदेशसभा बैठक स्थगित गरिएको छ ।
प्रदेशसभा सचिवालयले सूचना जारी गरेर मंगलवार बिहान ११ बजे बस्ने भनिएको प्रदेशसभाको बैठक अर्को सूचना नहुन्जेलसम्म स्थगित रहने बताएकाे छ । तीन कर्मचारीमा कोरोना संक्रमण पुष्टि भए खबर लगत्तै बैठक स्थगित गर्नुपरेको सचिवालयका एक अधिकारीले जानकारी दिए ।
झण्डै ६ महिनापछि पाँचौं अधिवेशन गत चैत ३० गते सुरु भएको थियो । त्यसपछि प्रदेशसभा सचिवालयले प्रदेशको नामाकरण र स्थायी राजधानी तोक्नेबारे प्रस्ताव आह्वान गरेको थियो ।
वैशाख १० गते बसेको प्रदेशसभा बैठकमा राजधानीका विषयमा दर्ता भएको प्रस्तावमाथि छलफल भयो । आज बस्ने भनिएको बैठकमा प्रदेशको नामाकरण विषयमा छलफलको कार्यसूची थियो ।
तर बैठक स्थगित भएपछि प्रदेशको नामाकरण र स्थायी राजधानी तोक्ने प्रक्रिया लम्बिने भएको छ ।
